मकवानपुरमा प्याराग्लाइडिङ उडानको परीक्षया सफल, अनुमतीको तयारी

काठमाडौ १८ पुस । मकवानपुरमा पनि प्याराग्लाइडिङ उडान सुरु भएको छ । जिल्लाको उत्तरी क्षेत्रस्थित पर्यटकीय नगरी भनेर चिनिएको थाहा नगरपालिकामा प्याराग्लाइडिङको सफल परीक्षण उडान भएसंगै अब यहाँ पनि प्याराग्लाइडिङ सुरु गरिएको हो । प्याराग्लाइडिङ सुरु भएपछि पर्यटकको आकर्षक गन्तब्यका रुपमा यस ठाउलाई लिइएको छ । थाहा नगरकै पर्यटन व्यवसायी बैकुण्ठ थापाले प्याराग्लाइडिङ सेवा सुरु गर्न लागेका हुन्।
थाहानगर–१० को विसिङ्खेलमा रहेको आइतबारे चौरबाट गरिएको परीक्षण उडान सफल भएको र अब व्यावसायिक रूपमा नै प्याराग्लाइडिङ गर्न सकिने पाइलट सागर क्षेत्रीले बताए। पाइलट सागर क्षेत्रीले नै प्याराग्लाइडिङको परीक्षण उडान गरेका थिए। प्याराग्लाइडिङको परीक्षण उडानमा पाइलट क्षेत्री र पर्यटन व्यवसायी बैकुण्ठ थापा सहभागी थिए। प्याराग्लाइडिङको सफल परीक्षणसँगै मकवानपुरको पर्यटकीय क्षेत्र आग्रा, टिष्टुङ, दामन, पालुङ, बज्रबाराहीजस्तै चित्लाङको विसिङ्खेलमा पर्यटकको आवागमन बढ्ने अनुमान गरिएको छ।